Ratt, Rattitt e Rattoni; Morigioeu
     e Orbitt, e Colmegnon,
     se invïen tutti cont in man el baston:
     i mamm cont i bagài taccáa dedrée;

     i marì coi miée;
     i amis coi amis.
     Ratt ciccolatt o negher, bianch o gris,
     a vun, a duu, a cinqu, a sett, a vott,
     se invïen tucc. — Vun porta ona valis,
     quell’alter on baull, quest chì on fagott;
     e, intant che ognun se invìa,
     se sent la litanìa
     di solit piagnisteri e di lament,
     che semper fà sentì la poera gent.