In San Caloss la cà l’è sora e sott.
     L’è già trii dì che se ved pù la Scianna!
     La Portinara la sta su de nott
     a speccialla; e la danna,
     pensand che, di cinqu numer giugáa al lott,
     n’è vegnuu foeura nanca vun, per dia!
     Che podessen creppà Màgol e Strìa!

I vesinn par che gabbien la scalmanna;
     e la sura Ghittin,
     squas come la fuss matta,
     l’ha mai finii de tirà a man la Gatta
     e el so pover Scianin!

— «L’è» — la dis — «che la gent l’è senza coeur!
     — «Chi senza coeur?» — repïa la portinara.
     — «Lee per la prima! Lee!» — «Ehi, che l’impara
     a trattà mèj!» — «E lee, quand che la voeur
     che parla scett e nett,
     che la mantègna quell che la impromett!»
     — «Coss’hoo impromiss?» — «Com’è?... L’è minga vera
     Che sto Scianin l’era impromiss a mi?»

E i vesinn: «Oh, quest sì
     l’è vera!... E de negall no ghè manera!»
     — «Ma lee, la vendarìa,
     per cinqu numer del lott, dáa da ona strìa,
     anca l’anima!» — «Ehi lee, la guarda ben
     come la fà a parlà!»
     — «Ghe doo quell che ghe ven!»
     — «E che numer!... De quij che vegnarà
     l’ann del mai!» — «Vegnì no o vegnì sì,
     cossa ghe importa a lee?
     Che la pensa puttost a sò marì!»
     — «A me marì??... Come el sariss a dì?»
     — Se parlì no pussée,
     che la ringrazia el ciel ch’usi prudenza!»
     — «Ah, quand l’è inscì, brutta vèggiazza, senza
     educazion, te saggiarée i mè sgiaff!»

A sto pont l’è dáa foeura el bulardée.
     Prima se sent on paff;
     dopo se sent on pon;

     la portinara la branca ona scoa;
     la Ghita la va in casa a toeu on baston:
     e, insomma, chissà quell che va a succed,
     quand se sent a vosà: «Ghè chì la Scianna!»
     E, difatti, se ved
     la gatta, cont i oeucc foeura ona spanna,
     saltà in mezz ai zabett, e, cont la bocca,
     ciappà la portinara per la socca,
     e poeu tiralla... finna a tant, che lee
     la finiss a capì de andaggh adrée.