Tranquil löet, eau t’am at vair la saira,
Tres pallids razs d’ la glün’illuminò:
Eau t’am at vair al gnir d’ la prümavaira,
Cur il godet da verd t’ho curunò.

5 Eau t’am at vair, cur cha l’utsché as pina
A fabbricher sieu gnieu nel vegl clucher,
El porta vita aint in la rovina;
Da trills e chaunts fò l’ajer resuner.

Sü nell’otezza l’utschein dechaunta,
10 Algrezcha, vita ün durò avgnir;
E giò nell bass d’ la mort la fotsch tagliainta
Pü d’üna flur tschunchet e fet melnir.

Staziun riainta d’ pêsch ed armonia;
Eir eau sun staungel e voless poser!
15 Be pochas fluors avet la vita mia
E quaistas pochas gettan bod s-chanter!