Comme porrò, grandissimo Ciabrera,
Dî mi cosa bastante a mostrâ cera,
Che d’un verme son minimo atretanto?

Se ro Córo dre Muze sacrosanto,
Che moǽ in Parnazo no ve ten portera,
Ve spende tra ri cigni dra sò schera
Per Gabriello Angelico a ro canto?

Taxerò donca, e con ossequio interno
Saran da mi re graçie reveríe,
Onde per Voî me veggo fæto eterno.

Voî che avei ri poemmi in sciù re die,
Cantando me trarrei da questo inferno.
Così, vivendo Voî, viverò mie.