X.

Quando veggo Zaniña a vista d’œuggio,
Resto ni ciù ni manco comme un scœuggio,
Con ro cœu morto, e con ra cera futa.

Resto lì con ra bocca bella sciuta:
Vaggo tutto in un suo, son tutto a mœuggio:
M’accorzo a ro scangiâ dro pin de l’œuggio,
Che ra morte con l’añima desputa.

Ma lê, chi ten ra ciave dro mæ cœu,
A me tira con l’œuggio uña coetta,
E me mega m un træto onde me dœu.

Chi sa? diggo tra mi: ra poveretta
A no fa fossia ciù, perchè a no pœu.
Così Amô me retorna in canderetta.