Quel dat buca sun, ei grischs ed aunc pignets;
Sibilla pren quel. Las alas el aulza tut leds,
Sco per engraziar. Ed ussa da bass quel di:
„Jeu erel schenaus de grir sco’ ls auters a ti,
Denton ti has elegiu il ver, il dretg.
Jeu digel a ti la verdat, quei ei miu deletg.
„Per ina gada jeu digel: Lein ir en curtin.“
Sibilla va o sin tschei maun egl jert carin,
E less bitschar igl amitg en siu caset.
In pign paradis ei il liug fluriu, quiet.
Quei jert dil signur ha sendas plaunas ulivas,
Cun eras bein pleinas de flurs soleglivas:
Rosers flureschan amiez entuorn la fontauna,
E rosas terlischan leu en splendur cotschnauna.
Gl’ utschi di ussa de bass: „Leu ord ina caglia
Pren giu ina torta, che fa survetsch de vaglia;
Mond dal quolm giu cun quella dai ina frida
Encunter la crappa sper via sternida.“ —
Sibilla dat aunc in’ egliada sugl jert merveglius —
E tuorna lu leda dal quolm misterius.
El maun seniester tegn ell’ il caset digl utschi,
El dretg la torta tagliada egl jert dil casti:
E mintgaton, vesend in crap leu sper via,
Dat ella la frida e vesa per sia legria,
Ch’ ei vegn ord la crappa spert in carstgaun,
Che leva sin peis e dat ad ella il maun:
Uss in cavalier, e gleiti ina dunschala;
Sibilla suenter buca ton liung’ uriala
Leventa ord la crappa ses agens frars:
Quels enconuschan la sora e betschan tut nars,
Dal grond legherment ded esser dad ella spindrai;
Encunter casa tuts treis ein viagiai.
Il sabi utschi el caset entscheiv’ a cantar:
„Affons ded in retg, tuts treis, jeu sai vus numnar!“
„Duront che vies bab er’ ius en in’ uiara,
Vies aug enguord ha fatg in’ ovra barbara,
Privond la regina da ses schi bials affons —
Ed aunc de menzegnas el ei sefatgs culponz —