Bein ha tschessau de flurir il rosèr amureivel
Cheu el curtin della mumma romontscha fideivel,
Reha raccolta de flurs als affons ei restada,
Vegn dals romontschs engrazieivel sur tut appreziada:
35Cert aschi ditg sco ils Grischs lur canzuns pon cantar
Vegnan las rimas dil Muoth tras lur vals resunar. —
Lunsch’ della biala Surselva da cor carezada,
Spetga a Cuera sil di della gronda levada
Leu ell’ umbriva dil dom tia salma mortala:
40Fluras alpinas orneschan las crusch triumfala,
Tscheu sin las rivas greppusas dil Rein anteriur
Resta tiu num en memoria perenna d’ amur.
O sera de stad,
Ruasseivla quieta!
Lev tilas flad
Ell’ aria frestgeta!
5 Has aunc la cotschnur,
Ti has gie bargiu,
Che bialla splendur
Id’ ei da rendiu.
Sur tiu frunt migeivel
10Ti rasas il vel,
In lev e legreivel
E miras tras quel.
Dil tschiel las nuorsettas
Van plaun pasculond,
15Staunclas navettas
Che van fantisond.
Flurs sbassan il tgau
E siaran ils êgls;
Semiond di il fau:
20Stei eri, mes fêgls!
Buna notg — ina conta —
Mureri saveis star!
— Ei merlotscha silla plonta —
Vi schon lu clomar!
25Er il Rein fa bien,
Adina ramura,
El ha mai sien,
Adina fa l’ ura.
Nanna el fa
30Cun sia ramura
Schi bein sco el sa
A mumma natura.
Igl uaul uss quescha,
La spunda cupida,
35Il quolm ponderescha
La steila salida!
EDUARD MUOTH.
Poesias.
La sera.
(Nach Annalas, S. 53, 1899.)