I ratt ghe corren denter
  dal tecc alla cantina;
  dì e nott ballen, roséghen;
  dì e nott ghe fan tonnina.

Del dì rámpen sui tavoi,
  de nott rámpen sui lett;...
  insomma, paren diàvoi
  sti porchi marcadett!

Ghè mai staa gatt ne trappol
  che je podess quiettà;
  sicchè la Strìa e el Màgol
  ghan on inferno in cà.

El sbraggia ben el Màgol:
  «Voglio comando e poss!...»
  I loder se ne impippen!
  Ghe salten finna addoss!

La Strìa, per faggh paura,
  la dòpera la scoa;...
  e lor dove la mangia
  ghe poccen dent la coa!

Infin, se sto disordin
  l’avess de seguità,
  la Strìa cont el Màgol
  no poden che scappà.