Ah, el gaveva reson
  el Capp di Colmegnon!
  El poer Scianin, in men de quindes dì,
  a furia de patì
  la famm, l’è stáa ridott magher, distrutt,
  de parì nanch pu quell, tant l’era brutt!
  Alter che i ratàtoj de robba finna
  promiss in la cusinna!
  El Màgol e la Strìa, per fà danée,
  mangien appenna de podè sta in pée;
  e figureves donch se al pover Scian
  voeuren mollaggh anca on boccon de pan!
  Hin già trii o quatter dì
  ch’el gà bell pari lù, per fass capì,
  a traggh di grand mognad!...
  No ghe risponden che cont di pesciad!
  Anzi ona volta lee, la vèggia Strìa,
  l’ha ditt al Màgol: «Per economia,
  adess che ghè pù i ratt,
  nun podarissom minga mangia el gatt?»