El dì l’è minga nancamò spontáa
  quand se dessèda Sua Maëstáa.
  — «E... inscì?» la ghe domanda la Regina.
  — «Me par de stà on poo mèj in stamattina!»
  — «Va là... torna a dormì
  che l’è minga anmò dì!»
  El Re el se volta; el se quietta;
  e, tirand on sospir, el dis: «Polpetta!»

Però, ai vott or, el torna a dessedass.
  — «Ohe... come vala?» — «Me par de rinass!
  Stoo propri mèj!» — «Ben, dorma on’altra oretta!»
  E el Re el cambia de fianch disend: «Polpetta!»

El derv i oeucc de capp vers i noeuv or.
  — «Voj, Regina, l’è tard!» — «Lassom quietta,
  che alla mattina el sogn el var tant or!»
  E el Re el se volta, e el torna a dì: «Polpetta!»

Ma, vers i des, tirandes in setton,
  Söa Maëstáa la scolta pù reson
  e la sbraggia: «Ghoo famm! Ah, marcadetta,
  sono o non sono il Re?...
  Olà!... Recate a me
  la mia regal polpetta!»