[[Categoria:Pagine che usano RigaIntestazione|Goldoni - Opere complete, Venezia 1910, VII.djvu{{padleft:238|3|0]]

Brighella. Un poco de tutto, védela, zentildonna.

Corallina. Saveu conzar la testa?

Brighella. Cappari! son scolaro de monsù Maronè.

Corallina. Saveu cusinar?

Brighella. Ho impara da monsù Pattacchiè.

Corallina. Saveu spender?

Brighella. Son sta arlevà da monsù Sgrafignè.

Corallina. Saveu portar un’ambassada.

Brighella. No vólela, son sta a scola da monsù le Metre Fransè.

Corallina. Donca, co gh’ave tutte ste abilità, licenzieve dal vostro patron, e vegnì a star con mi, che ve torrò volentiera.

Brighella. Ma... averò l’onor de servirla... senza che me licenzia dal mio padron.

Corallina. Cossa gh’intra con mi el vostro patron? Parlerò co sior Pantalon, e ve torremo al nostro servizio.

Brighella. Cara ela, la perdoni, me confondo un pochetto. No l’intendo ben, illustrissima.

Corallina. Oh, co sè un alocco, no fe per mi.

Brighella. Ma la supplico...

Corallina. No no, vecchio, mi no gh’ho bisogno de zente alocca.

Brighella. Ho inteso benissimo, ma voleva mo... cussì, finzer de no saver ogni cossa.

Corallina. Oh bella! No saveu che son novizza de sior Pantalon? Cossa voleu finzer de no saver?

Brigella. (Oh diavolo!) (da sè) So benissimo che ela l’è la sposa... de sior Pantalon.

Corallina. Sì ben, de sior Pantalon.

Brighella. Benissimo...

Corallina. E se volè vegnir a star con mi, ve torrò.

Brighella. Grazie...

Corallina. Licenzieve dal vostro patron.

Brighella. Senz’altro...

Corallina. Cossa xe che me pare incantà?

Brighella. Oh gnente... Con so permission, illustrissima.

Corallina. A revéderse.