El gh’ha una mente lucida,
  Un intelletto pronto,
  Che tutto rende facile.
  Che presto arriva al ponto.
  El sa le cosse serie
  Trattar con precision;
  E po grazioso e lepido
  El xe in conversazion.
  Amigo sincerissimo,
  De cuor e de bon fondo,
  Che cerca, che desidera
  Far ben a tutto el Mondo.
  Temperamento fervido,
  Che parla e che par bon,
  Che va talvolta in collera,
  Ma mai senza rason.
  A comandar giustissimo.
  Prontissimo al dover.
  In casa soa filosofo,
  E sempre cavalier.
  Fatto el ritratto in piccolo.
  Più a sguazzo che a pastela,
  A vu ve lasso el merito
  De insoazar la tela.

  M’ha consola moltissimo,
  Vero cussì, e ben fatto.
  D’un Cavalier che venero
  El nobile ritratto.
  Ma se m’ave dà el carico
  D’averlo a insoazar,
  So le mie forze, e dubito
  L’immagine guastar.