Pant. (stringendosi nelle spalle) Resterò. Son servitor. Devo obbedir. Ma cossa mai xe sti arcani!

Indovinela ti, grillo. Mi non intendo gnente. Qualche diavolo ghe xe, ma scometto tutto el sangue, che ho in tele vene, che el dise la verità. Mi lo conosso sto putto. L’ho arlevà mi. L’è sta sempre l’istessa sincerità insin da pichenin; noi xe mai sta capace de dir una busia. Se el rompeva una tazza, se el toleva un pomo, se el fava pissin, no l’è mai sta capace de scusarse con quella fandonia, che ghe insegnava la bonanema de mia muger, che gera la so nena. Xe sta el gatto, la massera, el totò; missier made; el diseva subito: son stato io, ve domando perdonanza, noi farò più; e cusì dal primo dì, che l’ha scomenzà a parlar, sin ancuo, che el ga vint’anni, noi xe mai sta capace di dir una falsità. So mi, che passion, che ga costà el rapir la Principessa con finzion; ma se trattava della vita de so fradello, bisognava farlo. O Giove, suggerirne vu, come possa defender un’innocenza, che non posso mostrar, ma che xe innocenza segura. Poveretto! a mi el s’ha raccomanda, a mi solo. L’è abbandona da tutti, caro el mio ben.