Negin sa mei pli consolar, —
Tristezi' ei mia sort!
Tristezia gronda sco la mar,
Che fui mo von la mort.
5 Sche neu, o mort, tier mei pupratsch,
Sil cor prest tschent' a mi
Tiu maun schi freid, schi freid sco glatsch,
Ch' el batti buca pli.
… Tgei tardas ti schi ditg, schi ditg?
10 O neu tier mei, malsaun,
E … meina prest mei ord il vitg,
Mein' or sil freid uclaun.
E han la fossa els cavau
Per metter en il miert.
15 Lu anfl' il cor, il cor blessau
Il giavischau confiert.