Carin vitget sill' amureivla spunda,
Pertgei has ti, pertgei po bandischau
Il plaid romontsch dals vegls schi carezau,
La viarva clara ferma e rodunda?
5 O mira, culla sanguinusa unda
Han tes babuns quei plaid romontsch bognau
E tes affons han freidamein scatschau
La cara schualma dalla veglia grunda!
Pertgei extrader la canzun romontscha?
10 Sa il gudogn canzuns bein remplazzar?
Freids rest' il cor tier quella nova tschontscha.
Jeu lasch' encrescher, less tei reclamar,
Car plaid romontsch, pil qual miu cor ballontscha,
Jeu sai plidar, mo mai dacor cantar.