Solegl mattutin, che risplenda sils auls
Sclarescha migeivel sur quolms ed uauls,
Doresch' ils castials sin il tschespet alpin,
E bogna il glatsch en igl aur vespertin.
5 Quei ei mia patria, miu Grischun;
Per tei resuna la canzun.
Leu si ella pezza, leu nescha nies Rein,
Pompusa la tenda e frestg il serein.
Las tegias salidan, las casas d' uclauns,
10 Il tun della tiba resuna suls plauns.
Quei ei mia patria, miu Grischun;
Per tei resuna la canzun.
Leu, nua che l' evla travers' ils cuflaus,
Camutschs en furtina surseglian sbuaus,
Mi par ei sco sch' in aunghel
Sgolass bufatg dagl aul
E sco sche melodias —
Tunassien tras gl' uaul.
15 Leu stat sin in cuvel ed ha bein agur
E tenda siu fisi in svelt catschadur.
Quei ei mia patria, miu Grischun:
Per tei resuna la canzun.
Las bovas smanatschan e sburflan suls vaus,
20 La bratscha purila defenda ils praus.
Defenda las ligias — rabatta il clom,
Ils dretgs della tiara, siu liber sulom.
Quei ei mia patria, miu Grischun;
Per tei resuna la canzun.