Verdas retschas en parada
Stattan guardia sugl uclaun,
La lavina leu sfrenada
Dostan ellas cun lur maun.
5 La lavina, che smanatscha
Sut ils pezs cun ardimen,
Che sezuola e secatscha
Sin rapina vehemen
E las bovas, che cupidan
10 El terren, ch' ei malurdaus,
Francan, cu las auras smidan
Nossas fueinas e nos praus,
Tschaffan cun valenta bratscha
Giu a funs el sbuadetsch,
15 Ferman tiara, che secatscha
Els uradis de cametsch.
Stgir uaul, vus veglias plontas,
Mo scurlei vos loschs tschupials!
Indiri da lutgias tontas
20 Veis comparsa da marzials.
Um grischun, sche honorescha
Tiu maletg leu si egl aul,
Dai adatg, mai vulnerescha,
Nun sfurzaus, tiu bi uaul.