ONA FAVOLA

M’han cuntaa che Porcinella
on dì el fava el prepotent
menestrand con la cannella
bott a tucc allegrament.

El sur Lelli, el Dottorazz,5
el Tartaja, el Pantalon
n’han faa e ditt de tutt i razz
per redull alla reson.

Ma co pù ghe la pettaven
reussiven a nagott10
e de gionta anca buscaven
quaj razion doppia de bott.

L’era appunt in sto travaj
la gran cà de Romanin
quand ghe riva proppi a taj15
el famoso Truffaldin;

Truffaldin, che l’eva staa
al servizzi, d’ona stria,
el gh’aveva giust grippaa
on bacchett con la magia.20

E con quell l’è andaa a incontrà
quell birbon de Porcinella
e spliff splaff te le mett là
incantaa lù e la cannella.

Malapenna che l’han vist25
dur e immobel come on mort,
foeura tucc i baracchist!
ghe n’han faa de tutt i sort,

gh’han daa bott, gh’han spuvaa in faccia,
gh’han ditt robba malarbetta,30
ma i pù spert a dagh la caccia,
i pù brav hin staa i poetta.

Quist che chì ghe s’hin taccaa
come can per i lustrissem
e gh’han scritt e gh’han stampaa35
perarij proppi bellissem.

Ma coss’è!... se romp l’incant,
Porcinella el torna viv;
alto, a gamb, mollen tucc quant
quij che baja e quij che scriv.40

Ora mò cossa credii
che nassess de sta lezion?...
Ch’abben miss el coo a partii!
Andee là che sii ben bon.

Per fortuna Porcinella45
l’è andaa ai quondam a fà cà,
se de nò serem a quella
de vedej anmò a scappà.