EL TEMPORAL

Carolina, varda, varda
come sguizza la saetta,
che tronada malarbetta!
Sent el turben che ingajarda.

Se quel ciall de don Galdin5
nol desmett con quij campann,
el forniss cont el tirann
on quaj fulmen sul coppin.

Carolina, Carolina,
minga in gesa per amor!10
Va a toeù i ciav, prest prest, corr corr,
giò, giò, andemm tutt duu in cantina.

Giò giò, andemm, no te dubitta,
che quij bej zifer morell
pitturaa sott al bocchell15
del mezzin salven la vitta.

Che s’ciarô!... Santa Maria!
Franch l’è on fulmen ch’è s’cioppaa.
Chè?... Perché mì hoo bestemmaa?...
Mì?... Set matta! va on poo via.20

Varda i fiamm, vardej lassù;
l’è s’cioppaa in del campanin...
E mò, quell bevevel vin?
bestemmavel anca lu?

Giò, giò, andemm senza tant ciaccol,25
che quij bel zifer morell
pitturaa sott al bocchell
del mezzin faran miracol.