ON FUNERAL
(El Miserere)
Vuna de sti mattinn tornand indree
de la scoeura de lengua del Verzee
con sott la mia scorbetta
caregada de tucc i erudizion5
che i serv e i recatton
dan de solet a gratis ai poetta,
me troeuvi senza asquas vessem accort
denanz a San Fedel che foeura e dent
l’eva tutt quant e mai paraa de mort.10
Me fermi suj duu pee come on gadan,
leggi el gran cartellon
che l’eva tal e qual a on sorascritt
d’una cassa de scuffi e cappellitt,
con sù in fond fina i P. P. del posa pian,15
e m’accorgi che tutta sta parada
a rebesch e fioramm
(senza invidia però) l’eva pientada
per on gran personagg passaa ai quondamm.
Esuss per lu, dighi in del coeur, fin chì20
mej dò voeult lu che mì.
Ma siccome de spess mì sont on tos
on freguj curios,
mò sissignor che m’è soltaa el petitt
d’andà in gesa a vedè25
che defferenza gh’è
tra el ben di sciori e quell di poveritt.
Gh’eva in mezz a la gesa ona baracca
fada a guglia a trii pian, volta comè,
con settaa sù per su30
di bej statov de rivi e de bojacca
rappresentant la motta di virtù
ch’el mort el gh’eva, o el ghe doveva avè.
Intrattant di canton
sbrodolaven giò scira in suj relev35
quatter candireron
pien de torc de Venezia a l’uso sev.
Intorna via del pè del cattafalch
cantaven come merli i sazerdott
col sò bell candirott40
e el sò liber in man,
segond ghe comandava l’abaa Alban,
che, svelt come on usell,
el tendeva per tutt spacciadament,
no lassand nanch mancà denter per dent45
i soeu bravi coppon
ai ceregh che patissen l’astrazion.
Giust in quella che intravi even lì adree
per daghela a cantà el Misereree;
e mì ch’el soo anca mì,50
pondem dedree di pret in genuggion
per ajutall a dì
e profittà intrattant de l’occasion
de fà on quaj poo de ben de mett inà
per quand ghe sarà el cunt de comodà.55
Mò el credarissev, fioeuj, che hoo avuu bell pari
a segnamm e a cercà de tend a mì,
che no gh’hoo possuu proppi reussì!
Gh’aveva de denanz duu strafusari
de pret vicciurinatt ch’a ogni tocchell60
de salmo e de versett
te ghe incastraven denter on tassell
de descors de politega e polpett,
de moeud che i mee intenzion de fà del ben
hin andaa a fass squartà,65
né hoo possuu condemen
de guzzà tant de orecc per dagh a trà.
Ecco chì come faven;
ma siccome v’hoo ditt che i pret cantaven,
besogna donca, se no ve rincress,70
che me lassev anmì canta l’istess.
Miserere mei Deus - E a disna?
secundum magnam - dò cossett o trè -
misericordiam tuam et secundum
multitudinem - de quist.75
E el scabbi come l’è?
Et multum lava me
ab injustitia mea, et a delicto -
Eel car? - Puttasca! - e subet munda me -
oh mì poeù el vin! - Tibi soli peccavi -80
s’el var pocch, mela cavi,
et malum coram te feci... in sermonibus
tuis, et vincas cum judicaris.
Chì inscì per intermezz scora ona gotta
de scira colda de la gestatoria85
che la sbrodola e scotta
vun di duu sazerdott che l’eva in gloria.
Soa reverenza el scrolla in pressa i did,
sclamand: Che porca d’ona scira, cisti!
e i olter canten, podend pù del rid,90
Ecce enim veritatem dilexisti.
In seguet fan el nomm
a paricc ostarij
in dove gh’è vin bon, ost galantomm,
e mejor compagnij.95
Vun loda l’ostaria de la Nos,
l’olter el Monte-Tabor,
e poeù tracch a dò vos
Domine... asperges me...
hyssopo... et super nivem dealbabor.100
Finalment ven de dent on militar
che a l’abet el pareva on paracar,
e lì tornen de capp: Vedel quell mèus?
Libera me de sanguinibus Deus,
Deus salutis meae, -105
che te possa vegnì la diarrea,
porch fe o fo! - et exultabit lingua mea...
Domine labia aperies, et os meum
annuntiabit - birboni! - laudem tuam. -
Oh per adess han pari a sbatt sti... Quoniam110
si voluisses sagrificium utique
dedissem holocaustis - l’eva vora,
gh’han ben la resca in gora -
Cor contritum - no serv - et humiliatum
Deus non spernit - la ghe passarà115
insemma con la spua - Benigne fac
Domine in bona voluntate tua
Voeurel mò dì? - Ut aedificentur muri
Jerusalem - Gh’el giuri... Vedaremm...
Ghe gionti sto sciloster120
se rivi a liberammen!
On olter anca mì... - Et clamor noster
ad te perveniat nunc et semper, amen.
Me volzi allora in pee
stuff e sagg de sta scenna, e ciappi post125
denanz l’altar maggior,
e preghi nost Signor
che in del me dì tremend del bulardee
el daga a trà puttost
ai dolor de chi paga i spes di esequi130
che a quij che canta de sta sort de requi