"Ché di còpe!" "Congrès catòlic? ben legnadis
di uèli sant!" "Ma il sfuéi noi à mal fevelâd."
"La nàpoli di còpe, j' ài dit, e al vèn fur spadis!"
"Cent mil francs e varèssin lassâds jù, cà in citâd."

"Cènt mil pedói!" " Ma fòlc, no la véso finide?"
"Il comèrcio al è mìsar, no si viód carantàns;
sarès stade par duçh une gubane." "Al sfide
di cuàtri." "Se vignìvin, suçedèvin malàns."

"E tornaràn di avòst, cuànd che sòn lis anguris
a dòi la fète!" "Ben, sintîd..." "Lassàid zujà,
sacramènt!" "... ché pulitiche..." "Jò no ài che figuris!"

"... che pòrche di pulìtiche, sintîd, ruvinarà
l’Italie!" "No zuéi plui!" "Cumò che sòn siguris? "
"O buti vie lis çhartis! Làid a fassi çh....!! "