Felizi cuorrast tü tras êrs e sendas
Del vegl zardin cha il sulai surdora,
Per far ün püschel est in grond’ fatschendas;
Dits fortünats! Infanzia, quaid’aurora!

5 Eu dod inminchatant ta vusch chi ria,
Ell’ün surir eir sün meis lefs atira.
O dutsch’infanzia temp plain da poesia,
Flur ch’in passand apaina l’hom respira!

Eir sch’ella ’s perda, ’s perda per adüna,
10 Pür l’algordanza d’ella ma na mora,
Reista tras il müdar da la fortüna
Sömi luntan ch’ün tscherch’e ch’ün adora!

O giod’infant! Ti’ inozaint öglada
Serain’in la daman d’ la vita mira,
15 Eu vuless dir a ti’ etad beada:
Alaunt il pass! — Il temp vain ch’ün suspira! …