Dornade d inverno
col fogo che và,
doi len da na parte,
ca vece a vardà,

al vento che sgorla
là, fora del viero,
fra i cuatro pomer
e i rame del pero.

Contasse doe storie
de n ota, se sa,
de cuanche deone
a Stabiere a seà,

de cuante fadie
par fei su la ciasa,
conprasse doe vace,
slargasse la stala.

E pò de chel ota
che apena voltou
é ruou la rosada
e l fen se à biandou.

Dornade d inverno,
scominzia a fiocà,
l é longhe le ore
ca chiete, a vardà …
I corve che vola
su là, fra le ciase,
i và a sbecotasse
doi pome giazade.
Contasse doe storie
che pò é senpre chele,
de cuanche a Santigo
aveone le fede

e po’ de chel ota
che son deste a passon
e doe se avea perso
su là pal giaron.

De cuante fadie,
ma ormai le é passade …
e ades che son vece,
ca chiete, sentade,

ades che son vece
e tenpo ne avon
se le penson dute
co n tin de magon.