ISABELLA ANDREINA comica est,
     Seculi decus, theatri decus,
     Socco et coturno.
Non minus suada, quam venus:
     Æque specie, ac eloquio suada;
     Æque eloquio, ac, specie venus.
Sed casta venus, et verecundiae stola ornata:
     Non salo, et spumantium fluctuum rore;
     Sed solo, novo musarum germine orta.
          Hanc vides, et hanc audis.
     Tu disputa, argus esse malis, ut videas;
     An midas, ut audias.
     Tantum enim sermonem vultus,
     Quantum sermo vultum commendat.
Quorum alterutro aeterna esse potuisset:
     Cum vultum omnibus simulacris emendatiorem,
     Et sermonem omni suada venustiorem
          Possideat.