Le Pavaró é na fetra sort dʼ Orco, solmënter chʼ ël stá ma tles faus y tles arbëies. Insciöche lʼ Orco é ʼci le Pavaró ri y da temëi, al é n bur bau, che taia les iames cun la sojora ai mituns, che vá tles faus a dʼ arobé cosi o res. Guai a chi che se lascia abiné da dʼ ël! Ël stá ascognü amez les faus, sciüra sciöche le variöl, scraia sciöche i corfs y les agaces. Le ce ál insciöche n gran cian, edli da füch, la bocia leria, dënz de fer, le ciapel sciöche la laurs, brac tan lunc, chʼ al arjunj saurí sura ciamp fora, grifes sciöche le valtú che pëia les iarines, por coda ál na gran bisca. Ël agüza tres la falc y la sojora ciantan: Agüza, agüza bëgn, Taia la iama ai mituns che vëgn.