Laschai clingir chant e magöl,
Cha ’ls tuns rebomban fin sün tschel.
La libertà tras uniun,
Legalità ais gnüd’in trun.

5 Dals gesuits, chi sun mütschats,
Dals pietists ed affilats,
D’els, chi armivan ils partits,
Tuots lur uters sun uossa sdrüts.

El corrumpaivan ledsch’e dret
10 Per tegner suot il spiert e pled;
Bazs austriacs daivan schluppets
Ed ils Franzes maligns buns pleds.

Perquai, o güvla ma chanzun!
Uoss’ais la libertà sül trun
15 Con seis celest cler vestimaint
A tuot Europa straglüschaint.

A noss guerriers fat pür onur,
Pustüt a general Dufour;
Ma tü ils hast electrizà
20 Con tia forza in vardà.

Ün Deis sulet nus adurain,
Be üna patria avain,
Üna güstia, egual dret
E libra cretta, liber pled.

25 Guarde da tschel, o bap etern,
Illümna nus e nos guvern,
Fa ’ns esser frars pro ’l bain comün,
Units pro libertà e glüm.

E generus compatriots
30 ’Lain perdunar als idiots,
A tuots orbits, tuots surmanats
Ils fain dvantar reacquistats.

E lura, scha il malcuvir
Ils potentats fess intervgnir,
35 Schi tuots per ün ed ün per tuots,
E noss’Elvezia non va suot.

Perquai ans dess tuot quai svagliar
Da ’ns esser svessa per cussgliar,
Con Dieu ün pövel bain units
40 E sainza egoists partits.

Rebomba, güvla ma chanzun!
Con ogni brava naziun
Ais la victoria in vardà,
Ais Dieu ed ais la libertà!