< Pagina:Goldoni - Opere complete, Venezia 1909, VI.djvu
Questa pagina è stata trascritta, formattata e riletta.
468 ATTO SECONDO

[[Categoria:Pagine che usano RigaIntestazione|Goldoni - Opere complete, Venezia 1909, VI.djvu{{padleft:480|3|0]]

SCENA X.

Strada.

Checchina, poi Toffolo.

Checca. Che la vegna quella sporca della sartora: vôi ben che la se desdiga. Adesso vedo come che la xe; la fava l’amor con Beppo, Beppo l’ha lassada, e ela, per refarse, l’ha inventà ste belle fiabe.

Toffolo. Oh, qua la xe, siora Checca? La sartora adessadesso vegnirà a casa.

Checca. Dove xela?

Toffolo. La xe qua in calle, adesso la vien. Che n’ha voleste a moverla. No la voleva vegnir.

Checca. Desgraziada[lower-alpha 1]! La sa la so conscienza.

Toffolo. Eccola qua.

Checca. Andè a casa, che adesso vegno.

Toffolo. (Cossa che me piase sta putta. Mi so tutto, e tant’e tanto la sposeria). (da sè, parte)

Checca. Me vien un caldo che no posso più; ma in strada vôi usar prudenza.

SCENA XI[1].

Anzoletta e detta.

Anzoletta. Cara siora, compatime se no son vegnua avanti. Gh’ho tanto laorier[2], che no me posso partir; e po vardè, m’ho ponto un deo, e no posso laorar.

Checca. Sarave meggio che v’avessi ponto la lengua.

Anzoletta. Oe, come parleu, siora?

Checca. Diseme, siora pettegola, aveu dito vu che mi no son fia de mio pare?

Anzoletta. Mi no digo busie. Sì ben, l’ho dito.

Checca. E come lo podeu dir?

  1. ↑ Scellerata.
  1. ↑ Sc. IX nell’ed. Bett.
  2. ↑ Lavoro: v. Boerio.
Questa voce è stata pubblicata da Wikisource. Il testo è rilasciato in base alla licenza Creative Commons Attribuzione-Condividi allo stesso modo. Potrebbero essere applicate clausole aggiuntive per i file multimediali.