[[Categoria:Pagine che usano RigaIntestazione|Goldoni - Opere complete, Venezia 1909, VI.djvu{{padleft:494|3|0]]

Beppo. Oh benedetto sior compare!

Checca. Oh caro sior compare!

Pantalone. Via, andemo, che sto comparezzo^{[lower-alpha 1]} me stroppia.

Beppo. Bondì, vita mia.

Checca. Vien presto, muso bello.

Beppo. Andemo, sior compare.

Checca. Me raccomando a ela, sior compare.

Beppo. Benedetto sior compare!

Checca. Caro sior compare!

Pantalone. Mai più compare, mai più compare. (parte con Beppo)

Checca. Manco mal che s’ha scoverto la verità. Vardè quanti pettegolezzi che aveva fatto quelle donne! E mi poverazza squasi più ho tolto de mezzo.

Toni. Checchina, allegramente.

Checca. Za so tutto. Sior Pantalon m’ha dito tutto.

Toni. El v’averà dito, che mi no son vostro pare.

Checca. Sior sì, el me l’ha dito.

Toni. E mi mo ve digo, che vostro pare xe vegnù a Venezia.

Checca. Oh, gh’ho ben a caro. L’aveu visto? Gh’aveu parla?

Toni. No l’ho visto, no gh’ho parlà. El m’ha mandà a chiamar; ma no l’ho più trovà. Un mariner m’ha dito che el ghe xe, e adessadesso lo troverò. Son vegnù a darve sta niova per vostra consolazion.

Checca. In verità, che ancuo posso dir de aver una zornada felice. Prima vederò mio pare, e po presto Beppo me sposerà.

Toni. No so; pol esser de sì, e pol esser de no.

Checca. Vardè, vede; no xelo el mio novizzo?

Toni. Finchè mi giera in liogo de vostro pare, podeva far de vu quel che me pareva ben fatto; adesso che xe vegnù vostro pare da senno, bisognerà che fè quel che el vorrà elo.