Questa pagina è stata trascritta, formattata e riletta. |
176 | ATTO TERZO |
[[Categoria:Pagine che usano RigaIntestazione|Goldoni - Opere complete, Venezia 1910, VIII.djvu{{padleft:186|3|0]]
SCENA IV.[lower-alpha 1]
Siora Giulia sola.
Mo za, no bisogna toccarghe sto tasto[lower-alpha 2]. El va subito sui zimbani[lower-alpha 3]. Co ghe vien quei susi[lower-alpha 4], vardela, vardela. Maledetta! Ho abuo più botte per culìa, che non ho magnà bocconi de pan! E mio mario ghe xe incocalio[lower-alpha 5]. Mo almanco fusselo solo, in tanta malorzega[lower-alpha 6], ma ghe va flusso e reflusso. Tolè, sior Todero gh’ha donà la scatola, e so muggier, poverazza, no la gh’ha debotto carpetta al cesto[1]. No la gh’ha altro che quel strazzetto de cotus coi aramali[2].
SCENA V.
Siora Tonina in zendà, e detta.
Tonina. Chi è qua? Se pol vegnir?
Giulia. Oh siora Tonina, patrona. A bonora fora de casa.
Tonina. Oimei! La lassa che me senta; no posso più. (siede)
Giulia. Coss’è, siora Tonina? Cossa gh’ala?
Tonina. Son desperada, siora Giulia; la me creda, che son dove che posso esser.
Giulia. Mo via, cossa ghe xe successo?
Tonina. Mio mario sta notte no xe vegnù a casa.
Giulia. Eh via!
Tonina. No ghe digo gnente che notte che ho fatto.
Giulia. Poverazza! Dove xelo stà?
Tonina. No so gnente. Ho mandà el garzon a cercarlo per tutta Venezia, e nol se catta.
Giulia. Sala dove che el sarà?