Zanetta.   A bonora.
Gnese.   Cossa diseu? son qua.
Cara fia, un secchio d’acqua.
Zanetta.   No ghe n’è gnanca un fià.^[1]
Xe tre dì che se pena; no ghe n’avemo un giozzo:
Mi, per far el levà, giersera ho sugà el pozzo.
E la parona cria co i vien con el bigolo^[2];
Gieri de quattro secchi la gh’ha dà un soldo solo.
Gnese. Quando che ghe n’avemo nu, ghe ne demo a tutti;
E per darghene ai altri, adesso semo sutti.
Zanetta. Andè da donna Rosega. Ella che la ghe n’ha,
Che i ghe n’ha messo in pozzo, ella ve ne darà.
Gnese. Me proverò. O de casa. (batte)

Gnese.   Cara siora,
Deme un secchio de acqua.
Rosega.   Le scomenza a bonora.
No ghe ne xe.
Gnese.   Ve prego.
Rosega.   No ghe n’avemo più.
Gnese. No ghe n’aveu compra?
Rosega.   Compreghene anca vu. (entra)
Gnese. Co ghe ne compreremo... vardè là che bel sesto!
No la me voi dar acqua, e la me volta el cesto^[3].
Zanetta. Bisogna compatirla. Perchè avè da saver
Che la gh’ha zente in casa.
Gnese.   Chi mai gh’ala?
Zanetta.   El forner.