< Pagina:Goldoni - Opere complete, Venezia 1911, XII.djvu
Questa pagina è stata trascritta, formattata e riletta.

LE DONNE DE CASA SOA 457

[[Categoria:Pagine che usano RigaIntestazione|Goldoni - Opere complete, Venezia 1911, XII.djvu{{padleft:463|3|0]]

Veggio parlar col barba; voggio parlar col putto.

Benetto. Chi vien?
Anzola.   Gnente; stè saldo, che xe qua mio mario.

SCENA V.

Gasparo e detti.

Gasparo. Dove seu? Anzoletta? seu qua?

Anzola.   Son qua, sì, fio.
Benetto. Sior compare, paron.
Gasparo.   Oh patron, sior Benetto.
Anzola. Sè vegnù presto a casa.
Gasparo.   Son suà[1].
Anzola.   Poveretto.
Vegnì qua, despoggieve. (s’alza) No ve stè a incomodar.
Podè, fin che el despoggio, seguitar a impirar. (a Benetto)
Gasparo. Chiamerò la massera.
Anzola.   Certo! giusto cussì!
El mio caro mario lo voggio servir mi.
Caveve la perucca. Tolè la galottina[2].
Tolè sto fazzoletto, deve una sugadina,
Deme el tabarro a mi. Caveve la velada.
La camisa sul letto xe de là parecchiada.
Andemose a muar[3].
Gasparo.   E l’impiantè cussì?
(accennando a Benetto)
Anzola. Sior compare, con grazia. Vegnì, vegnì con mi.
(prende Gasparo per mano, e parte seco)

SCENA VI.

Benetto solo.

Sì, comodeve pur. Mo che bona donnetta,

Amorosa, de cuor, che xe sior’Anzoletta!
Se ghe ne trova poche femene de sta sorte,

  1. ↑ Sudato.
  2. ↑ Berretta, piccola calotta.
  3. ↑ Cambiar vesti.
Questa voce è stata pubblicata da Wikisource. Il testo è rilasciato in base alla licenza Creative Commons Attribuzione-Condividi allo stesso modo. Potrebbero essere applicate clausole aggiuntive per i file multimediali.