Orsola. (chiama)
Orsola. Me chiameu?
Lucietta. Sentì: el foresto
Xe andà da Gasparina.
La se l’ha tirà in casa.
Orsola. Oh che mezzina!^[2]
Lucietta. Oe, credeu che ghe sia
Monea d’un tràiro?^[3]
Orsola. E so barba ghe xelo?
Lucietta. Vara! se el gh’è? El ghe l’ha mena elo.
Orsola. Chiama, chiama to mare,
Che ghe la vôi contar. (a Gnese)
Gnese. No, no, gramazza, no; lassela star.
Lucietta. Cossa gh’ala?
Gnese. Tasè.
Lucietta. Dormela ancora?
Gnese. El vin gh’ha fatto mal, l’ha butta fuora^[4].
Orsola. Ghe l’ho dito; sta vecchia
La beve co fa un ludro^[5].
Lucietta. Anca mia mare
La xe là ben conzada.
Oe, quattro volte la me xe cascada.
Gnese. Dove xela?
Lucietta. Sul letto,
Che la ronchiza^[6].
Orsola. Dove xe Anzoletto?
Lucietta. Anca elo xe qua.
In canton del fogher indromenzà.
Orsola. Quando sposistu?
Lucietta. Aspetto mio zerman,
E po de longo se darà la man.