Che el nostro sior Lunardo s’ha tolto un bel intrigo.
Felippo. El xe un omo de garbo; el farà de pulito^[1];
No v’indubitè gnente; so quelo^[2] che el m’ha dito.
E po co no gh’è done, se sta come se puol.
Ma co ghe xe carpete^[3], le vol quel che le vol.
Andreetta. Disè ben, sior Felippo, gh’è manco sugizion;
Ma le done in sti casi, credeme, le par bon^[4].
Mi me contenterave de star anca a dezun,
Se gh’avessimo tuti una dona per un.
Felippo. Che diavolo diseu? cento e vinti sotane?
No se sentiria gnanca a sonar le campane.
A unir tute ste done el saria stà un stramboto;
I diria ala Zueca, che ghe xe el taramoto.
Andreetta, via, se no cento e vinti, almanco una trentina.
Felippo. Pezo, caro Andreetta; ti è mato sta matina.
Tuti arente^[5] de lori vorave i più bei grugni:
Se farave regata^[6]; se se daria dei pugni.
Andreetta. No digo che le fusse done da strapazzar.
Le mugger, le cugnae se poderia menar.
Staressimo più aliegri.
Felippo.   No, xe meggio cussì.
In compagnia le done le me piase anca a mi;
Ma saressimo tropi.
Andreetta.   Eh t’ho inteso, baron.
Le te piase le done, co ti le gh’ha in scondon^[7].
Felippo. No tanto co fa ti^[8]; ma poco manco.
Andreetta.   Orsù,
Ancuo^[9]no gh’è remedio, no ghe pensemo più.
Semio deboto^[10] uniti? Che ghe ne manca assae?
Felippo. Ho visto fin adesso, dopo de mi arivae
Disdoto o vinti gondole.