Questa pagina è stata trascritta, formattata e riletta. |
I RUSTEGHI | 27 |
[[Categoria:Pagine che usano RigaIntestazione|Goldoni - Opere complete, Venezia 1914, XVIII.djvu{{padleft:35|3|0]]
Lunardo. Siora sì, in casa. Dove vorressi che andessimo[1]? all’osteria?
Lucietta. Sior no all’osteria.
Lunardo. In casa de nissun mi no vago[lower-alpha 1]; mi no vago, vegnimo a dir el merito, a magnar le coste a nissun.
Margarita. Via, via, no ghe tendè. Parlè con mi, figuremose, voleu invidar qualchedun?
Lunardo. Siora sì. Ho invidà della zente, e i vegnirà qua[2], e se goderemo, e staremo ben.
Margarita. Chi aveu invidà?
Lunardo. Una compagnia de galantomeni, tra i quali ghe ne xe do de maridai, e i vegnirà co le so parone[3], e staremo aliegri[lower-alpha 2].
Lucietta. (Via, via, gh’ho a caro). (allegra) Caro elo, chi xeli? (a Lunardo)
Lunardo. Siora curiosa!
Margarita. Via, caro vecchio[lower-alpha 3], no volè che sappiemo chi ha da vegnir?
Lunardo. No voleu che vel diga? Se sa. Vegnirà sior Cancian Tartuffola, sior Maurizio dalle Strope, e sior Simon Maroele.
Margarita. Cospetto de diana! tre cai sulla giusta[4]! I avè ben trovà ora del mazzo.
Lunardo. Cossa vorressi dir? No i xe tre omeni co se diè[lower-alpha 4]?
Margarita. Sior sì. Tre salvadeghi come vu.
Lunardo. Eh, patrona, a tempo d’ancuo, vegnimo a dir el merito, a un omo che gh’ha giudizio se ghe dise un omo salvadego. Saveu perchè? Perchè vu altre donne se troppo