[[Categoria:Pagine che usano RigaIntestazione|Goldoni - Opere complete, Venezia 1914, XVIII.djvu{{padleft:358|3|0]]

Checca. E cussì?

Rosina. E cussì gh’ho tirà, e gh’ho ditto che la vegna.

Checca. Ave fatto mal. Con quella zente no se n’avemo più da impazzar.

Rosina. Ave pur ditto de mandar a chiamar siora Meneghina.

Checca. Se vegnirà so barba, per una volta lasserò che la vegna; ma mai più, vede, mai più; no se n’impazzemo mai più.

Rosina. A mi me la contè? Cossa m’importa a mi?

Checca. E co la serva no voggio altri desmesteghezzi^{[lower-alpha 1]}.

Rosina. No so cossa dir, per sta volta gh’ho averto. Un’altra volta no ghe averzirò. Voleu che la manda via?

Checca. No, no, sentimo cossa che la vol.

Rosina. Ho sentio dei strepiti, son curiosa de saver qualcossa.

Checca. Sorella cara, moderèla sta curiosità. Cossa v’ha da premer a saver i fatti dei altri? Se Lucietta vien qua per far dei pettegolezzi, demoghele curte, e no la stemo gnanca a ascoltar.

Rosina. Ben, ben; mi fazzo tutto quello che volè vu.

Lucietta. Lustrissime.

Checca. Sioria.

Rosina. Sioria, fia.

Lucietta. Son scampada de suso, che nissun sa gnente: gh’ho da contar; ghe xe delle cosse grande.

Rosina. Cara vu, contème.

Checca. Via, scomenzemio? (a Rosina)

Rosina. Ih? cossa oggio ditto? (a Checca)

Lucietta. La gh’ala con mi, lustrissima? Cossa gh’oggio fatto?

Checca. In casa mia no voggio pettegolezzi.

Lucietta. La compatissa, giera vegnua per contarghe.... Se no la vol, no so cossa dir, lustrissima. (in atto di partire)