< Pagina:Goldoni - Opere complete, Venezia 1914, XVIII.djvu
Questa pagina è stata trascritta, formattata e riletta.

I RUSTEGHI 35

[[Categoria:Pagine che usano RigaIntestazione|Goldoni - Opere complete, Venezia 1914, XVIII.djvu{{padleft:43|3|0]]

Filippetto. Se la savesse! nol tase mai, nol me lassa mai un momento de libertà.

Marina. El fa ben da una banda. Ma da vostr’amia el ve doverave lassar vegnir.

Filippetto. Ghe l’ho ditto; nol vol che ghe vegna.

Marina. Mo el xe ben un satiro[1] compagno de mio mario.

Filippetto. Sior barba[lower-alpha 1] Simon ghe xelo in casa?

Marina. Nol ghe xe, ma no pol far che el vegna.

Filippetto. Anca elo, co el me vedè, co vegno qua, el me cria.

Marina. Lasse che el diga. La sarave bella. Sè mio nevodo[2]. Sè fio de una mia sorella; quella poverazza xe morta, e posso dir, che no gh’ho altri a sto mondo che vu.

Filippetto. No vorave che, per causa mia, el ghe criasse anca a ela.

Marina. Oh per mi, fio mio, no ve tolè sto travaggio. Se el me dise tantin, mi ghe respondo tanton. Poveretta mi, se no fasse cussì. Su tutto el cateria[3] da criar. No credo che ghe sia a sto mondo un omo più rustego de mio mario.

Filippetto. Più de sior padre?

Marina. No so, vedè, la batte là[4].

Filippetto. Mai, mai, dopo che son a sto mondo, nol m’ha mai dà un minimo spasso. El dì da laorar[lower-alpha 2] a mezzà e a casa. La festa a far quel che va fatto, e po subito a casa. El me fa compagnar dal servitor, e ghe n’ha volesto a persuader el servitor a menarme qua stamattina. Mai una volta alla Zuecca[lower-alpha 3], mai a Castello[5], mi no credo de esser passà in vita mia tre o quattro volte per Piazza[lower-alpha 4]: quel che el fa elo, el vol che lazza anca mi. La sera fina do ore se stà in mezza, se cena, se va in letto, e bondì sioria.

  1. ↑ Zio.
  2. ↑ I giorni da lavoro.
  3. ↑ La Giudecca, isola deliziosa dirimpetto a Venezia, e poco distante.
  4. ↑ Intendesi in Venezia, quando si dice la Piazza, quella di San Marco; le altre piazze si chiamano campi.
  1. ↑ Ed. Zatta: Mo el xe ben satiro compagno ecc. E così le edizioni recenti.
  2. ↑ Nella ed. Zatta c’è la sola virgola.
  3. ↑ Catar, trovare.
  4. ↑ «A un bel circa»: Capolavori di C. G. curati da F. Cameroni, Trieste, 1857.
  5. ↑ Uno de’ sestieri di Venezia, che ha delle passeggiale piacevoli.
Questa voce è stata pubblicata da Wikisource. Il testo è rilasciato in base alla licenza Creative Commons Attribuzione-Condividi allo stesso modo. Potrebbero essere applicate clausole aggiuntive per i file multimediali.