| Questa pagina è stata trascritta, formattata e riletta. |
| CHI LA FA L'ASPETTA | 425 |
[[Categoria:Pagine che usano RigaIntestazione|Goldoni - Opere complete, Venezia 1922, XXI.djvu{{padleft:431|3|0]]
SCENA V.
Lissandro e detti.
Lissandro. Patroni reveriti.
Cattina. E cussì? Vienli, o no vienli?
Lissandro. I vegnirà.
Cattina. Dove diavolo xeli ficcai stamattina?
Lissandro. Che dirò: sior Gasparo xe da sior Bernardin Zoccoletti per un negozio de canevi, che se el ghe va ben, el va a rischio de vadagnar almanco un mier de ducati, in tre o quattro zorni.
Cecilia. E cossa gh’intra siora Tonina?
Lissandro. Siora Tonina? La xe una donetta che val un milion. Sti marcanti che gh’ha sto canevo da dar via, i gh’ha bisogno de bezzi, ghe vol do mille ducati a la man, e siora Tonina s’ha cava le zoggie[1], e tanto che so mario contratta, la xe andada a trovar i bezzi.
Raimondo. Per cossa no ela vgnù da mi, che a gh li averia dadi senza un interess al mond?
Bortolo. Ma in sostanza, vegnirali, o no vegnirali?
Lissandro. I vegnirà.
Zanetto. Sentemose a tola[2] che i vegnirà.
Raimondo. Oh sgnor Zannett, cossa disia? Senza i patron de cà? L’am perdona, saravla una bella creanza?
Zanetto. La creanza xe bella e bona, ma mi gh’ho una fame che no ghe vedo.
Lissandro. E el negozio va lungo, e Dio sa quando che i vegnirà.
Lucietta. (Oh mi dobotto[3] chiappo su, e vago via). (da sè)
Raimondo. Ma coss’ha ditt el sior Gaspar?
Lissandro. Sior Gasparo gh’ha el mazor travaggio[4] del mondo, ma el sa che l’ha da far con de le persone che ghe vol ben, che no ghe vorrà far perder sta bona occasion, e el li prega, e el li supplica, el li sconzura de sentarse a tola, e de principiar.