A la marchesa Paola Travasa,
Vuna di primm damazz de Lombardia,
Gh’era mort don Gliceri, el pret de casa,
In grazia d’ona peripnèumonia,
Che la gha faa quistá in del sforaggiass
A menagh sul mezz-dí la Lilla a spass.

L’èva la Lilla ona cagna maltesa,
Tutta goss, tutta pel e tutta lard,
E in cá Travasa, dopo la marchesa.
L’èva la bestia de maggior riguard;
De moeud che guaja al ciel falla sguagní,
Guaja sbeffalla, guaja a dagh del ti.

El l’ha savuda el pover don Galdin
Che, in della truscia de l’elevazion
Avendegh insci in fall schisciaa el covin,
Gh’è toccaa lí all’aitar del pret mincion
E el so bon libi^[1] appenna in sacrestia.
De mett giò la pianeda e tocca via^[2].

In mezz a quest, appenna don Gliceri
IL’ha comenzaa a giugá a la mora el fiaa,
E cors de tutt i part on diavoleri
De reverendi di busecch schisciaa.
Per cerca de ottegní la bonna sort
De slargai fceura in loeugh e stat del mort.