Oh chi insci sí, el diseva el Missionari,
Besognava vedell sto religios;
Con pu gh’eya occasion de vess in l’ari,
Pussee el pareva ch’el fudess a spos;
Lu el vojava spuin^[1], vas, orinari,
Com’el vojass di impoll d’oeuli de ros;
Lu el nedrugava^[2] piagh, marsciur e crost
Come el nedrugass quáj^[3] de coeus a rost.

Quand se trattava poeíi de tend adree
A on ammalaa d’on maa de conseguenza.
L’era propi offellee fa el tò mestee;
Fraa Zenever dov’eel? Con reverenza
El gh’era saldo lí del pè di pee
Tutta la santa noce, anca in sentenza
De resta in del patton^[4] ^l settimann
Dritt dritt come el battacc in di campann.

Ma el fa stringh de la peli^[5] in di occasion
L’èva anmò, direv squas, on bescottin,
Ch’el n’ha faa fin de qui], giurabaccon.
De fass cred sassinaa in di mezzanin^[6];
E per quest sant Bernard el gh’a reson
Lá in dove el tratta de l’amor divin,
E che el dis ciar e nett, ve ziti el test,
Che Amor quoedam sancia insania est^[7].

Adess mò, i mee bagaj, che cognossli
Fraa Zenever con tutt i so virtú,
Stee quiett, demm a tra che sentirii
Quell fatt che v’hoo promiss de cuntav su.
Col dá ascolt, chi sa fors che no podii
Deventá tane Zenever come lu;
Se de nò restarii tanci Gervas,
Baciocch, Michee, Pasqual, quell ch’a Dio pias.