Mi, che infirava i mee volt ór de sloffen^[1],
Soeuli^[2], seguent e senza nanch voltamm;
Mi, mi che, articol lamm,
Avarev mangiaa i pee de sant Cristoffen^[3] ;
Mi adess, pover quajò^[4],
Pisorgni^[5] e scumi^[6] inscambi de dormí,
E, intuiti! tra chi^[7],
Ses colp, ogni boccon, per mandali giò.

Basta, anch sto dí, per quant el me pariss
Vun di pu long che m’abba mai passaa,
Infin l’è deslenguaa^[8],
E prima, prima on pezz, ch’el se scuriss,
Seva giamo in Quadronn^[9],
Che no gh’eva anmò insegna de pizza^[10],
Ne gh’eva nanmò a cá
Ne el Battista, ne i guardi, ne i stellonn!^[11]

Ah, quand che pensi, sangua de quel can,
Che gh’eva in tra i stellonn la Firisella,
On trattin la pu bella
E la mej ballarina de Milan;
E quand pensi che sera
El patron mi de toeuUa quand se sia,
Ah sanguanon de bia!
Me senti a andá giò el fond propi davvera!

Porco mi milla voeult, porcon, porcasc!
A vede che posseva in tra mi e lee
Guadagnamm tant assee
De famm on scior e de tra via i strasc;
E mi, porcasc, porcon,
Con pussee la me fava la giangiana^[12],
Che andavi a la lontana
E ghe giugava adree de repetton!^[13]