Infín, quand semm staa sagg de possenn pu,
Che no possevem dagh ne lee ne mi,
Semm andaa a cá a dormí
Giust in l’ora che i olter leven su.
Adess mo, lorocch, cappon,
Merla, cocó, quajott, occh, barbasgian,
Fis’cee, fee pur baccan,
Degh dent a scarpagoss, che semm al bon.

Tant’è, fioeuj: intramm dent lee in de Tuss,
Vegnimm lee in cá, e vedemm a scappa via
Quell pocch rest de legria
E de pas di dí indree, l’è staa on esuss.
De sto pont desgraziaa
No gh’è staa pu che guerr, che cattabuj,
Trappol, pastizz, garbuj,
Gir e regir e corna stermenaa.

Lee cagna^[1]^ lee cioccherá^[2]^ lee bosarda,
Lenguasciona, leccarda, desgarbada;
Lee imbrojona, sfacciada,
Starlattona^[3], lunatega, testarda;
Lee zavaj^[4], lee slandrosa^[5],
Lee sguanguana, lee capa di baltrocch;
Vardee, fioj, in pocch
Che boccon de belee Teva sta sposa?

Adrittura el prim dí, su e giò di scar,
D’ora e strasora, gent come i correr;
Soldaa, roffiann, pattèr^[6],
Can borian^[7] pussee che on port de mar.
La cá l’èva on faxall^[8]:
Ogni bott gh’eva lí on seccamincion ;
Seva nanch pu patron
(Con licenza) on besogn de posse fall.