Gh’eva in cá del dottor ona mammina
Che l’èva in d’on fastidi de no dí
Per scerní foeura el sit de fa insedi
I varoeul a ona sova piscinina.

Minga chi, perchè chi el dá tropp in l’oeucc,
Minga lá, perchè la se vedará;
Chi nanch, perchè ghe resta el segn di boeucc.

Tira, bestira, on mondo de reson,
Fin ch’el medegh, per falla quieta,
Femmegh Tinest^[1], el dis, in sui garon?

Oh che tocch de mincion
(La sclama sta sciorina a l’improvvista).
Sui garon? giust insci: pussee anmò in vista!

Alto scià penna, carta e carimaa,
E giustemm el nost cunt, sur Martineli:
Ch’el varda chi che hoo giusta preparaa
Tiraa foeura anca mi el me cuntarell:

A lu: tant per lenzoeu slisaa^[2] e sporcaa,
Tant per pan, per pitanza e fírisell^[3];
A mi: tant per falzett^[4] e gipp, s’ cioppaa
A furia de pacciá come on porscell;

A lu: tant per carocc inanz indree;
Tant per caffè, sorbitt, acqu e bombon;
Tant per latt, ciccolatt, cruzi e cuntee;

A mi: tant per la tolla del faccion^[5];
Tant per cremor de tarter al speziee;
Tant al dottor per l’indigestion.
Vedi a la conclusion.