Se i Milanes col scriv in milanes
Pretendessen de tra in terra el toscan,
Mi per el prim vorev che Don Giavan
El te ghe sonass giò sardell de pes;

Ma siccome l’è pubblegh e pales,
Manifest e patent a tutt Milan,
Ch’hin gent senza pretes, e bon vivan,
Vorèv mò inscambi ch’el ghe fuss cortes.

Tanto pu che stampand, stampen per lor,
E in cá soa, e per so divertiment,
E con licenza di superior;

E che infin dodes tomm n’hin minga assee
De porta el minem dann ai soeu talent
In d’ona Italia pienna de pessee^[1].

Catto! el me dis, che i soeu paroll toscann
Hin tutta grazia, tutta ziviltaa,
E poeu el ne sgogna dopo a brazz de pann,
Senza che gh’abbiem faa ne ben ne maa?

Ma catto! s’el voreva strapazzann,
El doveva almanch fall in sbottasciaa^[2],
Sbassass, come el dis lu, trattann, parlann
Cont el lenguagg di goff e di rabbiaa!

Insci mo, coss’hal faa con la sua piatta?^[3]
L’ha sassinaa de pianta i soeu argoment,
E el se desfaa líi de per lú la fatta:

E col vorrò sta sii e fa el caga in l’olla^[4],
L’ha obblegaa a volzass nun per stagh arent,
E a digh sii in bon toscan:»S/e//e che chiolla!