Akmett cont i soeu duu^[1], no avend coracc,
De fa ona bonna azion de Franzescan,
M’han miss a l’impegn mi col me mostacc
Per cercagh in sto Agost la bonna-man.

In la mia qualitaa donch de messacc,
Sciori, ve preghi de slarga la man;
Deghen giò di danee fina ch’hin sacc;
Che la sciallen anch lor, sangua d’on can.

Cerchee de fa el vost cunt; che in quant a merel
Ghe n’han, che gh’è nagotta de digh sii,
E infin de l’ann el menna quell preteret^[2].

In quant poeu al besogn, alla boletta,
Cisto Maria! se pò cerca de pú,
Quand per procurador gh’han on poetta?