Al pei dil culm schais, miu vitget,
La stgira notg vev' tei curclau
Mo ussa ei il di levaus
E mira sil vitget!
5 Il bi solegl vegn a riend
Dal piz tier miu deletg,
Sclaresch' als buns aschi bugend,
Al clar e bi vitget!
Sur casas brinas e sur tetgs,
10 Schi bialas sut gl' azur,
Con loschs sesaulza sco pastur
Il tempel e vitget!
Ed el pertgira tard e baul
Ils habitonts giu da siu ault,
15 El rimna els en devoziun,
Ils cars en miu vitget!
Fagiess la sort da mei in retg,
Beaus e leds en in casti,
Stovess el star en tiu rudi,
20 Miu car e bi vitget!