E daj con sto chez-nous: ma sanguanon!
Subet ch’el gh’ha sta gran cuccagna in Pranza,
Ghe va tant a andá fceura di cojon
E a torna a cá a godella sta bondanza?

In quant a nun, s’el ne usa st’attenzion,
In contrassegn de grata regordanza
El scassem subet giò del tabellon
Di baloss e di porch senza creanza.

Anzi, ch’el varda, vuj ch’el preghem fina
De no fa olter quand el riva a cá
Che parla maa de nun sira e mattina.

Insci almanch podatavem lusingass
Che paricc finalment, dandegh a tra,
Barattassen el sit d’andá a seccass.