Ma per lassa de banda l’ironia
Che no l’è piatt per lee, madamm Bibin,
Ghe diroo che interess de poesia,
Se no ghè del giudizzi in del coppin^[1],
I regol faran mai nagott de drizz,
Che la forma no fa el bon del pastizz.

  Certe regol hin anzi come el bust,
Coi stecch de fèrr, de tarlis^[2] doppi in spiga,
Che tante mamm, credendes de bon gust,
Metten sii ai so tosann per fai sta in riga;
Ghe fan dá in foeura el cuu, la panscia indenter,
E ghe rescien tutt la peli del venter.

  Insci, madamm, col bust di so unitaa.
Se rescía i temma, se stringa l’azion,
Deventa tutt coss suppa e pan bagnaa;
Se streng, se imbruga^[3] l’immaginazion,
E el camp de la natura, insci spazios,
El va tutt á forní in d’on guss de nòs.

  Insci per strengegh sii in vintiquattror^[4]
On fatt, che noi pò stagh in quel pocch spazzi,
O gh’el sciabelen giò de guastador^[5],
O gh’el fan canta su come el prefazzi^[6],
Con de quij soliloqui de repezz.
Che fan poeíi pari on ora on mes e mezz.

  E si, madamm Bibin, che dal moment
Che tre ór ghe sommejen vintiquatter,
La podarav mo anch comodament
Mett de part el penser d’ess in teatter,
E figurass inscambi de passann
Trenta, quaranta, on més, magara on ann.

  Perchè, se in d’ona fiasca d’on boccaa^[7]
L’è assee brava, madamm, de fagh sta dent
Mezza zajna^[8] de pú del mesuraa,
La pò anca vess capazza istessament
De faghen sta ona brenta e, s’el ghe par,
Magara el lagh de Comra, magara el mar.