Ora intani che l’abbondanza
L*è in viagg coni el resgló,
Vuj spassamm per la Brianza
Anmò on bott a fa gló gló.
Gh’hoo el petitt de impí el bottan^[1]
Cont on fior de firisell^[2]
Che se fa in d’on cantonscell
Su la volta de Vedan^[3].
Ah che vin, pader abbaa,
Limped, viv e savorii!
De quest chi in del vin de trii^[4]
No ghe n’è propi mai staa.

Se sto vin tal e qual l’è
El podess deventá on omm,
E mi aimií deventá on rè,
No vorèv de galantomm
Che sto scior vin de Vedan
El me stass on brazz lontan....

Ma, eel fors lu.... che denanz dagh el sagg
El me cascia in del cceur el coragg
De voltamm per brio bacco a descor
Col medemm
Noster re e imperator?
A sí ben che l’è lu!.., saldo.... andemm....
Alto, spiret, sur Carla!...^[5] politto....
Via ch’el parla — Moxtill!...^[6] spiret.... citto!

Cont el fum de sto vin, sacra majstaa,
Come procurador de! popol bass,
Ghe stampi in ciel pu mej che né sul sass
El giurament de amor, de fedeltaa!
Adess, majstaa, mò el leggiará adrittura
Sul volt de tucc la carta de procura.

Anem tucc: Trinche vain, prest allon,
Viva semper Franzesch nost patron!