Se i Milanes col scriv in milanes
Pretendessen de tra in terra el toscan,
Mi per el prim vorev che Don Giavan
El te ghe sonass giò sardell de pes;

Ma siccome l’è pubblegh e pales,
Manifest e patent a tutt Milan,
Ch’hin gent senza pretes, e bon vivan,
Vorèv mò inscambi ch’el ghe fuss cortes.

Tanto pu che stampand, stampen per lor,
E in cá soa, e per so divertiment,
E con licenza di superior;

E che infin dodes tomm n’hin minga assee
De porta el minem dann ai soeu talent
In d’ona Italia pienna de pessee¹.